A-C-C-R-A(IN PIDGIN ENGLISH)

A-C-C-R-A

Here be Accra

U go fit call here Ga or Nkrai

This be the capital of Ghana

Wey esan su be the gateway to Africa

This place dey bii basaaa

But ebi wild strategies

Den Mourinho tactics wey we dey take survive for here

Whether you be bibini or obroni

Ofrijato or hafco

You from Navrongo, Saskatchewan, Yonkee or Albuquerque

You get woman or you dey gnash

Accra go bii you, no matter what

Wanna chow for here be simple but we get varieties

For morning t’ inside

Koko against some koose or some bouncing toogbee dey rule

For shwane t’dier, more things dey

Fufu against some soup

Different kinds den varieties

Aponkye nkrakra, palm nut soup, nkatinkwai and things

Banku den tilapia too dey

Waakye den fish against some hot shitor

Beans den gari versus some smiling tatale

Ga kenkey against some kpakpo shitor den kpanla

Gari den tsintsinga and things be present

We finish aa, we dey wash the chow down wanna throat

Plus some chilled sobolo, burkina or asana den milk

For gbeke inside dier

Domedo against some chilled drink

Some cowbell milk den tsibom

Or some annointed indomie den eggs dey represent live

The deebees for here dier, tea den horlicks dem dey take

You wan live quiet den deebee life aa

You for go dey areas like Roman Ridge

East Legon, Airport, Trasaco Valley den things

Wey you wan chill deebee level aa

Go Silver Bird Cinema, Movenpick Hotel den Bonjour go chop pizza

But u wan enjoy Accra dier aa

You for dey areas where life dey jom basaa

Chorkor, Jamestown, Mantse Agboenaa

Osu, Nima, Maamobi

Mamprobi, Abossey Okai, Dansoman

Madina, Newtown, Pig Farm

Alajo, Caprice, Ashaiman

Adabraka, Kantamanto, Abeka Lapaz

North Kaneshie, Bubuashie, okaishie

Teshie, Awoshie, Kaneshie den Lartebiokorshie

Wey for der you wan chill aa, no yawa

Tawala Beach dey, Borla Beach dey

Oxford Street, Epo, Akuma Village

Vienna City, Auntie Muni Waakye Joint

Lavender Beach, Enso Nyame Ye spot,Onaapo Spot

Obra Spot den Korle Beach all dey

Friday nights be highlife den live band nights

Sundays be church service give some people

Wey for some, ebi omotuo special Sunday give them

Omotuo against some sweating beer paaa

I wan tok you more things but ma boys dey chok me for the roadside

But wherever you dey for the world inside

Whether you get money or not

You fine or you no fine

What I wan make you know be sey

Forget London, forget Yonkee, forget Dubai

Accra dey bii basaa

If you dey doubt me aa, come den come see….