DILUTED GHANAIANS
So what kraa be we naa wonna
own?
What we go fit call wonna
own plus vim?
How we manage turn
caretakers for wonna own country inside?
Why sey we be tenants for
wonna own land top?
Ebi sey Kwame Nkrumah
waste en time for nothing
Or sey we no know what be
good give we?
After over 50 years of
independence
We still dey live on Kwame
Nkrumah en old glory
What be the essence of all
the school we go?
Ebi sey we learn nothing
Or ebi sey we no get any
sense of national pride?
Why sey we no dey fit do anything
on wonna own?
Wey country kraa this?
God ankasa bless we plus
cocoa,coffee,minerals and things
But so,so begging edey jum
we
Chinese people come take
over wonna industrial sector
Them naa dey rule wonna
retail sector
Plus them ma internationally-certified
inferior goods
Ailomost everything for
Ghana now be ‘Made in China’
Go Agbogbloshie den Makola
market go see
Chinese people dey sell
everything
From common bamboo yele
pona to charlewotey
Lebanese people dey
control prices for the food crop market top
Indians den the British
dey pull strings on wonna educational sector
Nigerians come dey rule wonna
music den movie industries
South Africans den
Canadians dey drive wonna mining sphere
Wonna oil den gas sector
dier, I no wan talk demma matter
We dey invite foreign
contractors for ordinary road construction
Wonna own national budget
be funded from abroad
Indians wey dem come pay for
wonna own presidential palace construction
We dey go seek foreign aid
come build public toilet
Ordinary public toilet ooo!!
We no get ‘shame’ for wonna
national vocabulary inside?
What kraa be wonna own for
this country inside?
What we go fit do without external hands?
Aside wonna national debt
den the azonto dance
What again we go fit call
wonna own?
What kraa be wonna own?
